Коктейль 22.11.2023

Пугач стаў выдаўцом аўдыёкніг на беларускай мове. Што ўжо можна бясплатна паслухаць?

Пра пачатак сваёй дзейнасці абвясціла выдавецтва аўдыёкніг Litaralna, адным са стваральнікаў якога стаў лідар «J:морс» Уладзімір Пугач. Сярод першых дасяжных для бясплатнага праслухоўвання кніг «Кароткая гісторыя Беларусі» Вацлава Ластоўскага.

«Выдавецтва аўдыёкніг Litaralna – каманда энтузіястаў, аб'яднаных важнай мэтай – захаваннем і папулярызацыяй беларускай моўнай спадчыны: літаратуры, перыёдыкі, значных помнікаў беларускай думкі. Галоўная задача інстытуцыі – захаваць і перадаць важныя ўзоры беларускай культуры ў фармаце, зразумелым і даступным маладому пакаленню», – так кажуць пра сябе і сваю місію стваральнікі праекта.

Першыя тры кнігі ўжо можна бясплатна паслухаць на сайце выдавецтва – www.litaralna.com. Гэта:

«Кароткая гісторыя Беларусі» Вацлава Ластоўскага (1910),
«Адвечным шляхам» Ігната Абдзіраловіча (1921),
«Аповесць з майго часу, альбо лiтоўскiя прыгоды» Ігнація Янкоўскага (1854).

Усе кнігі чытаюць прафесіяналы сцэны: актор Алег Гарбуз, дыктар Аляксандр Памідораў i iншыя.

– Ідэя выдавецтва нарадзілася з таго, што я сам даўно і шмат слухаю аўдыёкнігі на шпацырах, у падарожжах. Але ў пэўны момант зразумеў, што вялікая колькасць важных для беларусаў літаратурных твораў яшчэ не мае аўдыёверсій. Неяк сустрэліся з сябрамі і вырашылі, што мы можам супольна зрабіць добрую справу для сябе ды іншых, – распавядае Уладзімір Пугач.

Запіс першых кніг пад шыльдай Litaralna адбыўся дзякуючы дапамозе польскага фонда Życie. Слухаць іх можна бясплатна, але жадаючыя могуць падтрымаць падрыхтоўку наступных кніг на сайце выдавецтва.

Тым часам гурт «J:морс» хутка дасць серыю канцэртаў у гарадах Польшчы: Кракаве (27.11), Уроцлаве (29.11), Познані (30.11), Гданьску (1.12), Беластоку (7.12), Варшаве (9.12).