«Прайшоў праз рознае, але цяпер справы наладжваюцца». Навіны з калоніі пра Андрэя Дзьмітрыева

Экс-кандыдат на прэзыдэнта Андрэй Дзьмітрыеў піша з калёніі: «Муракамі, Фройд і П’юза з «Хросным бацькам» сталі тут маёй кампаніяй».

Андрэй Дзьмітрыеў — адзіны зь пяці кандыдатаў на прэзыдэнта на выбарах 2020 году, які цяпер знаходзіцца за кратамі.

Тэрмін у паўтара года зьняволеньня былы кіраўнік грамадзкай кампаніі «Гавары праўду» адбывае ў наваполацкай калёніі, вядомай тым, што там трымаюць былога старшыню «Белгазпрамбанку», таксама ўдзельніка выбараў 2020 году Віктара Бабарыку, і актывістаў апазыцыі. Пра Андрэя Дзьмітрыева расказаў былы калега палітыка, які лічыць сябе «дастаткова абазнаным» у ягоных справах.

«Вучыцца пісаць левай рукой»

«Агульная сытуацыя ў яго такая: прайшоў праз рознае, але цяпер справы наладжваюцца. Ён прызвычаіўся, да яго прызвычаіліся. Працуе на вытворчасьці па здабычы каляровых мэталаў з кабэляў — ачышчаюць старыя драты ад ізаляцыі. Наколькі ведаю, гэтым шмат у якіх калёніях займаюцца, вось і яму такая праца дасталася. Праца нялёгкая, але ён чалавек працавіты, карпатлівы, засвоіў і гэтую. Плян выконвае», — расказала крыніца.

Паводле былога калегі Андрэя Дзьмітрыева, той пры дапамозе рэгулярных фізычных практыкаваньняў падтрымлівае добрую фізычную форму, у вольны час шмат чытае і займаецца самаўдасканаленьнем.

«Схуднеў, але адчувае сябе нармальна, на здароўе ня скардзіцца. Падцягваецца на турніку, адціскаецца, займаецца гімнастыкай. У вольны час шмат чытае, вучыцца. Там добрая бібліятэка, дык ён гэта выкарыстоўвае як мага лепей. Зь беларускіх кніг прачытаў «Мову» Марціновіча і кнігі Горвата, шмат чытае замежнай літаратуры, прычым ня толькі мастацкай. Паведаміў паўжартам, што цяпер «Муракамі, Фройд і П’юза з «Хросным бацькам» сталі там ягонай кампаній.

Яшчэ ведаем, што Андрэй займаецца самаўдасканаленьнем: вучыцца пісаць левай рукой. Навошта яму гэта, невядома, але вось ён такі. Таксама па самавучыцелях вучыцца шахматам і вывучае гішпанскую мову. Карацей, максымальна карысна выкарыстоўвае час, які даводзіцца пражываць за кратамі. Ягоная каманда мяркуе, што зь ім усё будзе добра», — падзяліўся зьвесткамі пра Андрэя Дзьмітрыева ягоны сябра.

«У нашы справу моцна веру»

Былы кандыдат на прэзыдэнта Андрэй Дзьмітрыеў быў затрыманы ў студзені 2023 году. Палітыка абвінавацілі ва ўдзеле ў масавых пратэстах, а таксама ў сувязях з Захадам.

«Таксама ўстаноўлена, што падазраваны 599 разоў перасякаў дзяржаўную мяжу Рэспублікі Беларусь, зь іх 33 — пасьля 2020 году. Сьледзтва мяркуе, што наяўнасьць кантактаў у Дзьмітрыева з прадстаўнікамі Захаду і ЗША можа сьведчыць аб каардынацыі ягонай палітычнай дзейнасьці з-за мяжы. Ёсьць інфармацыя, што затрыманы кантактаваў зь Дзяржаўным сакратарыятам ЗША і асабіста зь ягонай былой кіраўніцай Гілары Клінтан», — паведамляў пра Дзьмітрыева Сьледчы камітэт Беларусі.

Неўзабаве ў інтэрнэце зьявіўся зварот палітыка, запісаны на выпадак затрыманьня.

«Што б са мной ні адбылося, калі раптам гэтая мая прамова будзе апошняй перад ня ведаю калі наступнай, я хачу сказаць, што я ў вас, у нас, у нашу справу моцна веру. І верыў усе гэтыя гады. Таму пайшоў кандыдатам на прэзыдэнта, таму раблю тое, што я раблю, і таму буду працягваць», — сказаў у сваім звароце экс-кандыдат на прэзыдэнта Андрэй Дзьмітрыеў.

Сёлета ў красавіку Андрэю Дзьмітрыеву прысудзілі 1,5 года калёніі паводле 1 часткі 342 артыкулу Крымінальнага кодэксу («Актыўны ўдзел у дзеяньнях, якія груба парушаюць грамадзкі парадак») і пасьля марнай спробы абскардзіць прысуд адправілі ў калёнію № 3.

У траўні памерла маці Андрэя Дзьмітрыева, але на пахаваньне палітыка не адпусьцілі.

Беларускія праваабаронцы прызналі Андрэя Дзьмітрыева палітзьняволеным.