«Чым пахне чабор?» Рэп-дэбют ад настаўніцы беларускай мовы – «Беларусіца»
Настаўніца і літаратарка Ганна Севярынец выступіла ў новым амплуа.
Дэбютам сталі трэк і кліп «Беларусіца», дзе яна зачытала рэп, якiя прысвечаныя прафесіі настаўніцы беларускай мовы. Хіп-хоп вандроўка ў галактыку беларускай класікі адбываецца разам са школьніцай Уллянай (Atesta) і студэнтам Стэфанам. За аранжыроўку і мясісты прадакшн песні адказны Аляксей Паўловіч, за анімаваны кліп — візуальная мастачка @mus4getes.
— Дасведчаныя людзі кажуць, што адзін з канцэптаў рэпу — «рэспект», — кажа Ганна Севярынец. — Для мяне наш праект — мой рэспект усім, хто стварае, выкладае, чытае, слухае і глядзіць беларускае. А яшчэ вельмі важна, што палова ўдзельнікаў «Беларусіцы» — школьнікі і студэнты. От ім, а таксама ўсяму беларускаму школьніцтву і студэнцтву — асобны рэспект.
Па словах аўтара ідэі Алеся Плоткі, праект не мае планаў на «хіпхапізацыю» ўсіх прафесій у настаўніцкай, але рады натхніць на тое, каб «рабіць нечаканае і рабіць так, як не робіць ніхто».
Беларусіца (тэкст – Ганна Севярынец)
Уночы на даху халодна і вецер,
Але гэта, брат, адзінае месца ва ўсім свеце,
Дзе можна нарэшце паслаць усё падалей,
Забіць цвікамі дзверы і не ціснуць на педалі,
Не выносіць смецце, не хадзіць за хлебам,
Не імкнуцца быць тым, кім ты ніколі не быў,
Абаперціся спінай на халодную цэглу
І сядзець і глядзець у неба.
І глядзець у неба аж да самага світання,
У цябе да яго, брат, усяго адно пытанне.
Куды ты ідзеш, хто наогул там ідзе
У агромністай такой грамадзе?
І навошта гэта ўсё, гэта ўсё табе навошта,
Што хавае твая чарговая плошча,
У якім жахлівым сне гэта ўсё магло прысніцца?
Ты спытайся ў сваёй беларусіцы.
Няхай скажа яна, дзе тут Колас, дзе Купала,
Чаму адзін выжыў, а другога ня стала,
Ці шырокія парэнчы у той каменнай лесвіцы,
Куды абаперціся адно што павесіцца.
Яшчэ спытайся, адкуль гэта ў горле,
Пра тую «мову нашу», «пакуль не памёрлі»,
Чаму у Багушэвіча ці нешта такое
Была ля хаты прыхаваная зброя?
Хай яна не маўчыць, а скажа нарэшце,
Чаго хацеў Гарэцкі, а чаго хацеў Зарэцкі,
І адкуль дзве душы голага звера,
Які сядзіць у табе дасюль хоць і ніхто ў яго не верыў?
Хай яна адкрые таямніцу гэтых дахаў,
Па якіх усё імчыць паляванне Стаха,
І той, каго чакаў, не прызямляецца ў Гародні,
Не трыста год таму, не учора, не сёння.
Чаму чырвоны месяц пакідае сіні бор,
Чым пахне чабор, чым пахне чабор?
І калі яно настане, тое цёплае лета,
Калі са сценак змыюць кроў і загавораць партрэты,
Адчуюць пад нагамі сцежку людзі на балоце,
Тыя самыя два словы пішуць зноў на кожным плоце.
Калі нябесны знак і заўтра і тады
Перастане быць знакам бяды.
І калі нябесны знак і заўтра і тады
Перастане быць знакам бяды.
Оцените статью
1 2 3 4 5Читайте еще
Избранное