Благасфэра пра Грузію ды беларускую мову
Тое, што статус беларускае мовы выклікае віхуру эмоцыяў і што кампутарнікі лічаць яе ‘непадрыхтаванай-нераспрацаванай’ для выкарыстаньня на сваіх сайтах — такая тэндэнцыя вядомая. Тое, што расейскія блогеры ў сваёй бальшыні адрозьніваюцца ‘велягурыстасьцю’ выказваньняў па тых меркаваньнях, якія не зьбягаюцца зь іхнымі — для мяне ня стала неспадзянкай, хаця прыгажосьць расейскае мовы ў іхным выкананьні часта была такой, што можна было ня толькі забараняць ананімныя выказваньні, але пакідаць камэнтаваньне адкрытым выняткова для фрэндаў: зьнешнепалітычнае фіяска Расеі раптам актывізавала ўсіх аматараў “местных идиоматических выражений”. Гэта калі не казаць, што дзеецца ў расейскае благасфэры пры абмеркаваньнях, напрыклад, забойства Эўлоева.
Вось тыповае для апошніх
дзён абмеркаваньне
чарговага вызнаньня дыктатарам Нікарагуа Паўднёвае Асэтыі й Абхазіі. Аўтар, які цалкам слушна аспрэчвае некаторыя
лягістычныя моманты гэтае працэдуры, сутыкаецца з хваляй “абурэньня” на свой
адрас. Падавалася б, калі прызналі — ну дык і чакаем на ахвіцыйную абвестку МЗС
Нікарагуа, чаго валтузіцца?
Такое адчуваньне, што
большасьць блогераў з Расеі лічыць, што гэта “іхная благасфэра”, пра што
сьведчыў ліст да ўладальніка сэрвісу Носіка ад “расейскіх блогераў” за часам
актыўнае фазы грузінска-расейскага канфлікту. Маўляў, ‘нельга дазваляць, каб
расейская благасфэра сталася антырасейскай’. Трэба пакінуць спадару Носіку належнае:
ён нагадаў аматарам “паданьня слушнае інфармацыі” той факт, што ЖЧ кіруецца
амэрыканскімі законамі пра волю выказваньняў ды што большую частку аўдыторыі
Часопіса складаюць усё-ткі амэрыканскія падлеткі, і што расейскамоўная благасфэра
— гэта толькі сэгмэнт, які не складае й паловы сэрвісу.
Чытаньне камэнтараў да паходу на матч Грузія-Расея
выклікае тыя ж эмоцыі, як, зрэшты, і да перадруку праз sirjones адозвы Грузінскага
нацыянальнага алімпійскага камітэту да МАК ды Жака Роггэ асабіста аб пераглядзе
рашэньня што да месца правядзеньня зімовае алімпіяды 2014. За хваляй абразаў
чуецца гістэрыка: а што, калі насамрэч аднясуць? Колькі тады людзей згубіць
грошы, якія яны ўклалі ў Сочы, як даведаліся аб падзеі — 2014? А аднесьці
могуць, калі ў рэгіёне захаваецца нестабільнасьць.
Другая асноўная тэма
апошняга тыдню — абмеркаваньне новага выпуску часопісу ‘34’ аб беларускай мове.
Вось тут можна пабачыць рэакцыю “інтэрнаўтаў”
на чалавека, які “сьвядома не размаўляе па-беларуску”. Прыблізна тая ж
танальнасьць дыскусыяў захоўваецца й пад астатнімі допісамі на тую тэму.
Благасфэра апошнім часам далёка адышла ад месца цывілізаваных дыскусіяў ды пераўтварылася ў асяродзьдзе, дзе кожны, карыстаючыся ананімнасьцю, можа сказаць нешта непрыязнае ды нават абразьлівае, на што, можа быць, ніколі б не наважыўся ў жыцьці. Хвароба, ня ўласьцівая для сур’ёзнае часткі ангельскамоўнае благасфэры, раптам апынулася вельмі прычэплівай да “сур’ёзных беларусаў”. Пытаньне ў тым, дзе тут галоўны чыньнік: праблема росту ці агульная культура?
Оцените статью
1 2 3 4 5Читайте еще
Избранное