Палітычная кан’юнктура за год можа істотна змяніцца. Напрыклад, Расея пачне больш актыўныя дзеянні па паглынанні Беларусі — і трэба будзе шукаць нейкія сілы, якія б супраціўляліся ўжо не Захаду, а ўсходнім намерам, што вельмі верагодна.
«Беларускія ўлады спрабуюць зрабіць гібрыд з «мірных людзей» і адначасова рэвалюцыйна настроеных бальшавікоў»
Палітолаг — пра тое, як барацьба за мір ператвараецца ў падрыхтоўку да вайны.
Для беларускіх ідэолагаў і работнікаў інфармацыйна-прапагандысцкіх груп распрацавалі новую метадычку — пра нарастаючае супрацьстаянне з Захадам, «антыбеларускую інфармацыйную кампанію» і неабходнасць бараніць краіну ад пагроз з дапамогай народнага апалчэння.
Ужо 17 жніўня абмяркоўваць «ролю закона «Аб народным апалчэнні» ў забеспячэнні нацыянальнай бяспекі краіны» будуць у Мінскай гарадской ратушы — плануецца анлайн-падключэнне прадпрыемстваў сталіцы. Аналагічныя дні інфармавання і візіты ідэолагаў у працоўныя калектывы пройдуць па ўсіх рэгіёнах.
Пра тое, што атрымаецца з ідэі «паставіць пад ружжо» беларусаў, і ці не разбурае гэты заклік наратыў пра мірнае неба, Филин пагутарыў з палітолагам, дырэктарам інстытута «Палітычная сфера» Андрэем Казакевічам.
— Складваецца ўражанне, што за тры гады ад пачатку палітычнага крызісу ва ўладаў так і не з’явілася новай ідэалогіі, таму эксплуатуюць усё тыя ж савецкія наратывы пра «Беларусь партызанскую» і «супрацьстаянне з Захадам».
Ці атрымаецца на гэтай глебе заклікаць беларусаў уступаць у народнае апалчэнне?
— Мне падаецца, што атрымаецца, хутчэй, дэманстратыўна-прафанацыйная акцыя, і ўсё-ткі не ўдасца стварыць надзейнага апалчэння. Фармальна туды пойдуць людзі, выбраныя мясцовай уладаю і сілавымі структурамі.
Але матываваную частку могуць скласці толькі прыхільніки некаторых прарускіх, русканацыяналістычных арганізацый, а таксама былыя працаўнікі праваахоўных органаў — але далёка не ўсё, а пераважна тыя, хто маюць «рускаміраўскія» погляды. Тое самае тычыцца войска.
Гэты кантынгент, напэўна, можа прадставіць нейкі касцяк апалчэння. Ва ўсіх астатніх — не думаю, што гэта выкліча сур’ёзны энтузіязм.
Нават калі ідэя народнага апалчэння ўсё ж сапраўды выкліча масавы водгук, мяркуе эксперт, атрымаецца як у той прыказцы — «у кіі два канцы, і абодва б’юць».
— Добра вядома, як камсамолец Басаеў ваяваў у Чачні, бо кожны камсамолец меў магчымасць атрымаць пачатковую вайсковую падрыхтоўку. Тое самае мы бачым у вялікай колькасці краін. Але ж калі людзей вучыць ваяваць, даваць ім зброю — то не факт, што гэтыя людзі будуць ваяваць за цябе. Прычым нават тыя, хто проста зараз стоадсоткава «за» рэжым.
І ў такім выпадку навучаныя, падрыхтаваныя да вайны «антызаходнія» людзі — тое, што гуляе не на карысць дзеючай уладзе, а супраць яе.
Апалчэнне як мадэль абароны, сцвярджаюць беларускія ідэолагі ў новай метадычцы, выпрабавана ў многіх краінах свету (нават заходніх). І гэта насамрэч рэч добрая, згаджаецца палітолаг, — калі сфармаваныя інстытуты дзяржавы, нацыянальная ідэнтычнасць, легітымныя органы ўлады. Тады народнае апалчэнне можа стаць дадатковым рэсурсам для супрацьстаяння знешнім пагрозам.
— А калі гэтага няма, то сітуацыя можа абярнуцца па-рознаму, і часам непрадказальна для саміх стваральнікаў падобных арганізацый.
— Незалежныя сацыёлагі адзначаюць, што антываенны кансенсус у беларускім грамадстве вельмі моцны, незалежна нават ад палітычных перакананняў. Ці не разбураюць улады заклікамі да абароны свае ж папярэднія наратывы пра мірнае неба і «толькі б не было вайны»?
— Не, гэтыя заклікі не супярэчаць ранейшым ідэалагемам. Прапаганда кажа, што мір — гэта вельмі важна, і за яго трэба змагацца, таму, калі вораг прыйдзе на нашу зямлю, мы мусім з ім ваяваць.
У прынцыпе, гэта старая савецкая схема, добра адпрацаваная на розных узроўнях: маўляў, мы не хочам ні на кога нападаць (хоць часам нападаем), але гатовыя абараняцца, калі на нас нападуць. То бок, такая вайна за мір.
Зараз беларускія ўлады спрабуюць зрабіць гібрыд з «мірных людзей» і адначасова рэвалюцыйна настроеных бальшавікоў, гатовых змагацца за нейкія каштоўнасці — справядлівы, у іхнім уяўленні, сацыяльны парадак і светаўладкаванне.
І ў гэтым рэчышчы будуецца ідэалагічная стратэгія, дзе абсалютна без праблем спалучаюца супярэчлівыя рэчы, а бясконцая вайна — гэта і ёсць барацьба за мір.
Оцените статью
1 2 3 4 5Читайте еще
Избранное