«Усё робім правільна!» Топ-следчы Яўген Юшкевіч даў інтэрв'ю з СІЗА
Яўген Юшкевіч — заўважная фігура ў юрыдычных колах Беларусі. Ён вядомы ўнёскам у раскрыццё анлайн-гандлю наркотыкамі, а таксама вядзення справы педафіла Давыдовіча, па якой праходзілі сотні пацярпелых.
У 2020-м ён заняў пазіцыю падтрымкі законнасці. А таксама запусціў праект кансультацый па працаўладкаванню для сілавікоў, якія больш не хацелі выконваць незаконныя загады.
Юшкевіч не з'ехаў з Беларусі пасля першага свайго затрымання па крымінальным артыкуле, і ў выніку быў затрыманы па іншым — расстрэльным артыкуле 289 Крымінальнага кодэкса «Акт тэрарызму».
Але палітвязнем Юшкевіч не прызнаны да гэтага часу. Незразумела, чаму.
«Нашай Ніве» удалося зрабіць з Юшкевічам кароткае інтэрв'ю з СІЗА
— Любімае месца ў Беларусі? Чаму?
— Асіповіцкія лясы — бо яны сапраўдныя, некранутыя.
— Месца на зямлі, якое найбольш уразіла?
— Скандынавія — можна жыць проста, спакойна і багата.
— Якая якасць найбольш дапамагае за кратамі? Якая чалавечая якасць найбольш замінае за кратамі?
— Больш за ўсё дапамагае жаданне вучыцца, чытаць, пазнаваць. А замінае канфліктнасць і раздражняльнасць. Сутыкаўся тут з людзьмі не вельмі разумнымі, праз гэта ўзнікалі канфлікты
— Хто ваш герой з сучаснасці ці мінулага і чаму?
— Усе тыя, хто ахвяруюць сабой для права і законнасці. Сябе да іх не прылічваю.
— Калі б вярнуўся ў 2020, то ці нешта зрабіў бы інакш? Ці стаў бы выязджаць?
— Нічога б не змяніў — шалёны і цікавы год. Не, не з’ехаў бы.
— Што зробіш першай справай, апынуўшыся на волі?
— Першай справай абдыму ўсіх… але калі тое будзе.
— Якія ўмовы ў цябе ў камеры? Якія праблемы? Што за людзі побач? Як адносіны з сукамернікамі і ахоўнікамі?
— Якія ўмовы — рабі высновы сам, я былы супрацоўнік… А людзі розныя.
— Як праходзіць дзень у камеры? Чым звычайна займаешся? Што прачытаў, а што плануеш?
— Чытаю кнігі па праграмаванні, крыміналогіі і тэорыі канфліктаў, чытаю Гандзі. Імкнуся фізічна займацца, радуюся шпацырам.
Читайте также
— Як вынікі выкладання матэматыкі і інфарматыкі сукамернікам?
— Вельмі здорава, больш мне падабалася, але і ўсім, каму выкладаў, таксама. Бяда, што ім усім свеціць па 10 год.
— Чаго больш не хапае ў СІЗА?
— Больш за ўсё не хапае святла — сядзім як у нары. Пры гэтым, святла ва ўсіх сэнсах.
— Што б ты сказаў беларусам, што губляюць ці згубілі надзею на лепшае?
— Усё, што рабілі, лічу адзіным правільным, і цяпер тое што робім — правільна.
— Якая падзея з апошніх найбольш уразіла?
— Дзьве ахвяры за апошні час — дарма, ні за што, такога не павінна было быць.
***
Пісаць Яўгену Юшкевічу можна па адрасе: 220030, г. Мінск, вул. Валадарскага, 2, СІЗА-1.
Оцените статью
1 2 3 4 5Читайте еще
Избранное