«Лукашэнка спрыяе стварэнню атмасферы страху, пры якой ніякія выбарчыя працэсы нельга назваць дэмакратычнымі»

У Стратэгічным дыялогу, сустаршынямі якога выступілі намеснік памочніка дзяржсакратара ЗША па справах Еўропы і Еўразіі Крыстафер У. Сміт і беларускі дэмакратычны лідар Святлана Ціханоўская, узялі ўдзел прадстаўнікі шматлікіх урадавых устаноў ЗША разам з шырокім колам беларускіх дэмакратычных актараў і прадстаўнікоў грамадзянскай супольнасці, паведамляе прэс-служба Дзяржаўнага дэпартамента ЗША.

Падчас Стратэгічнага дыялогу ўдзельнікі абмеркавалі жахлівыя парушэнні правоў чалавека з боку рэжыму ў дачыненні да беларусаў.

Злучаныя Штаты працягваюць заклікаць да безумоўнага вызвалення каля 1300 палітычных зняволеных, якія знаходзяцца за кратамі па ўсёй Беларусі за рэалізацыю свайго права на свабоду выказвання меркаванняў або свабоду сходаў, і будуць садзейнічаць прыцягненню рэжыму да адказнасці за парушэнні правоў чалавека.

Злучаныя Штаты таксама адзначылі свае праграмы па пашырэнні і захаванні ўнікальнай нацыянальнай і культурнай ідэнтычнасці беларусаў, у тым ліку мовы, літаратуры, мастацтва і гісторыі.

Ключавой тэмай абмеркавання сталі так званыя «выбары», прызначаныя на 26 студзеня 2025 года. Абодва бакі адзначылі, што Лукашэнка спрыяе стварэнню атмасферы страху, пры якой ніякія выбарчыя працэсы нельга назваць дэмакратычнымі, а парушэнні рэжымам правоў чалавека фактычна замарозілі сапраўдную палітычную дзейнасць і дыскусіі ўнутры Беларусі.

Злучаныя Штаты заклікаюць рэжым правесці свабодныя і справядлівыя выбары пад міжнародным назіраннем.

Удзельнікі Стратэгічнага дыялогу таксама абмеркавалі дэстабілізацыйны ўплыў рэжыму Лукашэнкі на рэгіянальную бяспеку.

Злучаныя Штаты асудзілі саўдзел рэжыму ў вайне Расіі супраць Украіны і падкрэслілі важнасць крокаў для выяўлення і спынення патокаў крытычнай падтрымкі і кампанентаў, якія садзейнічалі расійскай агрэсіі праз Беларусь.

Злучаныя Штаты падтрымліваюць імкненне беларускага народа да суверэннай, дэмакратычнай будучыні і вітаюць дзясяткі тысяч мужных беларусаў, якія рызыкавалі і працягваюць рызыкаваць многім дзеля дасягнення сваёй свабоды.