Адвакатку палітвязьняў Бабарыкі, Ціханоўскага і Дзядка адхілілі ад працы

Адвакатку Натальлю Мацкевіч адхілілі ад працы, супраць яе ў Мінюсьце Беларусі распачалі дысцыплінарную вытворчасьць, паведамляе Радыё Свабода.

Адвакатка Натальля Мацкевіч, якая, сярод іншых, абараняла былых прэтэндэнтаў на пасаду прэзыдэнта Віктара Бабарыку і Сяргея Ціханоўскага

Пра гэта Свабодзе паведаміў былы судзьдзя Аляксандр Дзядок, сына якога палітвязьня Мікалая Дзядка апошнім часам абараняла Натальля Мацкевіч.

Сама Натальля Мацкевіч ад каментару адмовілася.

— Пакуль ніячога казаць ня буду, — сказала Натальля Мацкевіч.

Паводле Аляксандра Дзядка, ён валодае дакладнай інфармацыяй, што Натальлю Мацкеівч ад працы ўжо адхілілі:

— Стаіць пытаньне пра пазбаўленьне яе ліцэнзіі. У майго сына ў выніку ўвогуле прававая катастрофа — ён падчас судовага сьледзтва другі раз застаецца без абароны. Спачатку пазбавілі ліцэнзіі Яўгена Маслава, цяпер пад такой жа пагрозай Натальля Мацкевіч.

Тыдзень таму яна яшчэ змагла наведаць сына ў СІЗА на Валадарскага, плянавалі, што наведае ўчора, а тут такая праблема. Лічу, што гэта мэтанакіраванае пазбаўленьне права на абарону людзей, якія ня ўгодныя рэжыму, — сказаў Аляксандр Дзядок.

Натальля Мацкевіч працуе ў Менскай гарадзкой калегіі адвакатаў, абараняла шмат каго з палітвязьняў, у тым ліку Віктара Бабарыку і Сяргея Ціханоўскага.

Оцени статью:
1
2
3
4
5
Средний балл - 1.3 (оценок:14)